WATENDAJI KATA WATAKIWA KUTOA USHIRIKIANO KWA TIMU YA HALMASHAURI YA WILAYA YA MBOZI WAKATI WA UKUSANYAJI MAEREJESHO YA MIKOPO YA ASILIMIA 10

Kurushwa hewani: May 14th, 2024

Mwenyekiti wa Halmashauri ya Wilaya ya Mbozi Mhe. George Musyani amewataka watendaji wa kata kuhakikisha wanatoa ushirikiano wakati timu ya Halmashauri inapokwenda kufuatilia wadaiwa  wa marejesho ya mikopo ya asilimia 10 ya Halmashauri

Mhe. Msyani ametoa maelekezo hayo katika kikao cha Baraza la Madiwani la Kata la kuwasilisha taarifa za kata lililofanyika katika ukumbi wa Halmashauri.

Akizungumza wakati wa ufunguzi wa baraza hilo la madiwani, Mwenyekiti huyo amesema kuwa Halmashauri inaanza mkakati wa kufuatilia madeni  ya marejesho ya mikopo ya asilimia kumi kwa ngazi ya kata hivyo watendaji wa kata watoe ushirikiano kutokana na wao kuwafahamu wanufaika waliokopa katika ofisi zao.

"Wakati wa ufutiliaji wa hizo fedha Mtendaji hakikisha kikundi husika kinapatikana katika ofisi yako ya kata  kuepusha usumbufu" amesisitiza

"Tunahitaji zoezi lifanyike ndani ya muda mfupi hivyo ukiwa kama kiongozi wa kata nenda ukawahamasishe hao watu wa vikundi waweze kufanya marejesho mapema kwa hiari. Sio sifa nzuri  kwa vikundi vyetu kuanza kupelekana mahakamani wakati maridhiano yangefanyika" ameeleza

Mwenyekiti huyo ametumia fursa hiyo kuwataarifu kurejeshwa kwa mikopo ya asilimia kumi ambayo inawahusi Wanawake vijana na watu wenye ulemavu ambayo itaanza kutolewa rasmi Julai 1, 2024.