ANZISHENI KLINIKI YA KUWABAINI VIJANA WATUKUTU MJINI MLOWO

Kurushwa hewani: November 2nd, 2023

Mkuu wa kituo cha Polisi Mlowo, John Maro amewashauri wenyeviti wa mitaa katika mji mdogo wa Mlowo wilayani Mbozi mkoani Songwe kuanzisha kliniki ya kuwabaini vijana watukutu katika mji huo.

Maro ametoa ushauri huo leo Alhamisi Novemba 2, 2023 katika kikao cha Baraza la Kata katika mji mdogo wa Mlowo cha kupitia taarifa za utekelezaji katika kipindi cha robo ya kwanza.

Akitoa elimu katika baraza hilo, amesema kuwa suala la ulinzi na usalama ni muhimu kutokana na mji huo kuwa ni mji wa kibiashara hivyo kukiwa na usalama wa kutosha watu watafanya shughuli zao kwa amani.

‘’Usalama ni kitu muhimu sana katika masuala ya kibiashara ili shughuli zetu ziweze kwenda ninashauri katika maeneo yenu tuanzishe kliniki itakayolenga kuwabaini watu watukutu ambao tutawahoji na watatupatia taarifa za wahalifu katika maeneo yao” amesema.

Mkuu wa Polisi huyo amesisitiza suala la uanzishwaji wa ulinzi shirikishi ili kuimarisha usalama katika mitaa ya mji huo mdogo huku akitoa wito kwa wamiliki wa maduka kuweka walinzi katika maduka yao.

Maro amewataka viongozi wa mila na dini kusimamia na kusisitiza suala la kutoa elimu kwa jamii kutokana na kuwepo na matukio mengi ya watu kujiua, ulawiti na ubakaji.

Akifunga kikao hicho Mwenyekiti wa Mamlaka ya mji Mdogo Mlowo, Anna Mwasaka ameliomba Jeshi la Polisi kuchunguza uwepo wa ajali nyingi katika kipande cha barabara kuanzia Karasha mpaka Mlowo mjini.

‘’Tunaomba Jeshi la Polisi mtusaidie kumekuwa na ajali za mara kwa mara katika kipande cha Karasha mpaka Mlowo stendi kitu ambacho kinasababisha kupoteza nguvu kazi kubwa ya taifa’’ amesema.