DAS MBOZI AWATAKA WATENDAJI KATA KUSIMAMIA UTEKELEZAJI AFUA ZA LISHE WILAYA MBOZI

Kurushwa hewani: November 9th, 2023

Katibu Tawala wa Wilaya ya Mbozi, Ndugu Mbwana Kambangwa amewasisitiza watendaji wa kata katika wilaya hiyo kusimamia utekelezaji wa afua za lishe ili kutokomeza udumavu.

Kambangwa ametoa agizo hilo leo Alhamisi Novemba 9, 2023 wakati wa kikao cha tathmini ya utekeklezaji wa mkataba wa lishe kwa robo ya  kwanza ya mwaka wa fedha 2023/2024.

Amewataka watendaji kuitisha vikao katika maeneo yao vya kujadila na kupanga namna ya kufikia malengo ya mkataba huo wa lishe.

Watendaji fanyeni majukumu yenu hata bila posho, itisheni vikao, ukijua nafasi yako utatekeleza majukumu yako vizuri amesema

Katibu Tawala huyo wa Wilaya ambaye alimwakilisha Mkuu wa Wilaya hiyo, Esther Mahawe amewataka watendaji hao wa kata kutoa taarifa za maendeleo na changamoto wanazokutana nazo wakati wa utekelezaji huo wa afua za lishe.

Nendeni kasimamieni suala la uchangiaji wa chakula katika kata mashuleni. Wazazi wanaokataa kuchangia chakula waiteni na muwaelekeze ameagiza

Amesema kuwa ukosekanaji wa chakula kwa wanafunzi ni miongoni mwa sababu za udumavu hivyo amewasihi watendaji kuwaelimisha wazazi wajue umuhimu wa chakula shuleni kwa watoto  wao

Amezitaka kamati za vyakula shuleni kufuatilia uchangiaji wa chakula kwa wazazi ili kuwapunguzia mzigo walimu.